Ministrja e Arsimit, Shkencës, Teknologjisë dhe Inovacionit, Arbërie Nagavci dhe ministrja e Drejtësisë, Albulena Haxhiu, në kuadër të fushatës sensibilizuese kundër dhunës në shkolla kanë bashkëbiseduar me nxënësit e shkollës “Xhemajl Mustafa” në Prishtinë, të cilët ishin duke zhvilluar një aktivitet me punë në grupe dhe po trajtonin tema të ndryshme të cilat ndërlidhen me këtë dukuri.
![](https://masht.rks-gov.net/wp-content/uploads/2023/03/337253930-1831595673894364-3947711661930872013-n-1024x683.jpg)
Ministrja Arbërie Nagavci pasi dëgjoi prezantimet e grupeve theksoi se, MAShTI ka politika të avancuara dhe dokumentacion të nevojshëm për të parandaluar këtë dukuri, por që sfidë mbetet zbatimi i tyre në praktikë, për çka Ministria është duke u angazhuar gjatë gjithë kohës.
Ministrja ndër të tjera tha se, qëllimi i kësaj fushate vetëdijësuese është që nxënësit të kenë të qartë se sa e rëndësishme është që të ndajnë informatat për dhunën, qoftë ndaj tyre apo ndaj dikujt tjetër, dhe se sa e rëndësihme është siguria e tyre në shkolla.
![](https://masht.rks-gov.net/wp-content/uploads/2023/03/337347042-892409808511536-4765846769111300648-n-1024x683.jpg)
Ministrja Albulena Haxhiu i përgëzoi nxënësit për temat të cilat i kishin ndarë dhe përgjigjet që i dhanë gjatë shtjellimit të tyre. Ajo tha se për të parandaluar dukuritë negative arsimimi cilësor është jashtëzakonisht i rëndësishëm.
Ky grup i nxënësve gjithashtu prezantuan idenë që të ketë Ditë kundër bullizmit, pasi sipas tyre kjo dukuri është bërë mjaft shqetësuese dhe duhet të shtohen aktivitetet vetëdijësuese kundër saj.
![](https://masht.rks-gov.net/wp-content/uploads/2023/03/337275154-1282143322337445-2126373540346457849-n-1024x683.jpg)
Last modified: 24 Mars, 2023