Ministria e Arsimit, Shkencës, Teknologjisë dhe Inovacionit në bashkëpunim me Qendrën për Këshillim, Shërbime Sociale dhe Hulumtime (Qendra SIT) kanë hartuar pakon e moduleve ku janë ofruar informacione bazike mbi temat e ndërlidhura me Ligjin për mbrojtjen e fëmijës dhe rolin e shkollës në trajtimin e tyre.
Ministrja e Arsimit, Arbërie Nagavci me këtë rast ka thënë se, MAShTI e ka parim kyç sigurinë dhe mbrojtjen e fëmijëve nga çdo dukuri negative dhe ofrimin e një mjedisi të sigurt për ta.
![](https://masht.rks-gov.net/wp-content/uploads/2023/09/383079388-688674143291955-6256019966526037819-n-1024x683.jpg)
Nagavci tha se, duke parandaluar rreziqet ndaj fëmijëve mund të sigurojmë e zhvillimin e tyre të plotë në aspektin fizik, intelektual, social e emocional, ndërsa shtoi se, pakoja e moduleve që po lasohet sot është në përputhje të plotë me kurrikulat arsimore dhe legjislacionin në fuqi.
![](https://masht.rks-gov.net/wp-content/uploads/2023/09/383080821-688674126625290-685892673511321174-n-1024x683.jpg)
Ndër të tjera, ministrja Nagavci falënderoi të gjithë partnerët dhe bashkëpunëtorët vendor dhe ndërkombëtarë, të cilët kanë kontribuar në finalizimin e kësaj pakoje dhe po ashtu edhe anëtarët e grupit punues për hartimin e suksesshëm të këtyre moduleve.
![](https://masht.rks-gov.net/wp-content/uploads/2023/09/382487758-688674093291960-4301481505544003027-n-1024x683.jpg)
Drejtori i Qendrës për Këshillim, Shërbime Sociale dhe Hulumtime (Qendra SIT), Kadri Gashi foli për rëndësinë e këtyre moduleve të cilat synojnë mbrojtjen e fëmijëve nga rreziqet në internet, mbrojtjen nga braktisja e shkollimit, diskriminimi, gjuha e urrejtjes, etj.
Ndryshe, modulet e ofruara brenda kësaj pakoje janë në përputhje me kurrikulat arsimore dhe legjislacionin në fuqi. Pakoja përmban 12 module tematike, të cilave u paraprin kaptina mbi ndërlidhjen me kurrikulat tona arsimore dhe përmbyllet me mundësinë e trajtimit të tyre edhe përmes trajnimit, përfshirë atë me bazë në shkollë.
![](https://masht.rks-gov.net/wp-content/uploads/2023/09/382475621-688674116625291-2409964334402556497-n-1024x683.jpg)
Last modified: 25 Shtator, 2023