Në kuadër të pjesëmarrjes në Forumin Botëror të Edukimit në Londër, ministrja e Arsimit, Shkencës, Teknologjisë dhe Inovacionit, Arbërie Nagavci ishte pjesë e panelit me temën “Si ta shfrytëzojmë me maturi teknologjinë e aplikuar në arsim”.
Në këtë panel ndër të tjera u diskutua rreth asaj se, çka nënkupton përdorimi me maturi i teknologjisë kur aplikohet në fushën e arsimit; a mund të thuhet se tani aplikimi i teknologjisë ka për qëllim avancimin e të nxënit, përpunimit të të dhënave dhe zhvillimit të mësimit, si dhe nëse po shfrytëzohet maksimumi i potencialit pozitiv të teknologjisë dhe po kufizohen në maksimum aspektet negative.
![](https://masht.rks-gov.net/wp-content/uploads/2023/05/346084858-3321548941392585-1496155018138059170-n-768x1024.jpg)
Ministrja Nagavci me këtë rast ka theksuar se, maturia luan rol kyç në edukim në shumë dimensione, duke filluar nga hartimi i kujdesshëm i politikave arsimore e deri te implementimi i suksesshëm i tyre.
Nagavci tha se, Strategjia e Arsimit synon zhvillimin e materialeve alternative dixhitale dhe të kompetencave për përdorim të teknologjisë me qëllim të rritjes së cilësisë në mësimdhënie dhe mësimnxënie, krahas planifikimit, monitorimit, vendimarrjes dhe politikëbërjes.
Nagavci ka ritheksuar përkushtimin e Qeverisë për të garantuar që nxënësit tanë të kenë qasje në arsim cilësor, pavarësisht nga prejardhja apo vendndodhja e tyre, duke shtuar se rol kyç në avancimin e rezultateve në arsim kanë mësimdhënësit.
![](https://masht.rks-gov.net/wp-content/uploads/2023/05/346097481-763231695359038-8493982952428531452-n-1024x682.jpg)
Last modified: 11 Maj, 2023