Me rastin e shënimit të Ditës Ndërkombëtare për Internet të Sigurt, ministrja e Arsimit, Shkencës, Tenologjisë dhe Inovacionit, Arbërie Nagavci ka vizituar ShFMU “Selman Riza” në Fushë Kosovë për të parë nga afër aktivitetet e kësaj shkolle me qëllim të promovimit të përdorimit të sigurt të internetit nga fëmijët dhe të rinjtë tanë.
Qëllimi i këtyre aktiviteteve është ndërgjegjësimi i shoqërisë dhe mobilizimi i institucioneve për koordinim dhe bashkëveprim në mbrojtjen e fëmijëve në internet.
Ministrja e Arsimit, Arbërie Nagavci me këtë rast ka qëndruar në një orë mësimore ku është folur për sigurinë në internet, ngacmimet me të cilat mund të përballen nxënësit si pasojë e përdorimit të internetit në mënyrë të pakontrolluar dhe rëndësinë e shfrytëzimit të platformave të ndryshme të cilat ndihmojnë fëmijët që të zhvillojnë njohuritë e tyre.
![](https://masht.rks-gov.net/wp-content/uploads/2023/02/330772153-5438265472944883-6316533442026629480-n-1024x683.jpg)
Ministrja Nagavci gjatë bashkëbisedimit me nxënës dhe mësimdhënës ka folur edhe për pakon e udhëzuesve dhe dokumentet tjera të rëndësishme të cilat i ka zhvilluar MAShTI të cilat synojnë shmangien nga keqpërdorimi i teknologjisë informative, dhuna digjitale, shkelja e privatësisë dhe elementeve tjera negative të dëmshme për çdo individ dhe shoqëri.
![](https://masht.rks-gov.net/wp-content/uploads/2023/02/330565270-899782484594399-2972465010916320674-n-1024x683.jpg)
Ndryshe MAShTI, bazuar në mandatin e vet, ka nxjerrë Udhëzimin Administrativ për mbrojtjen e fëmijëve në internet, i cili ka për qëllim që institucionet edukativo-arsimore dhe aftësuese në nivelin parauniversitar të adresojnë mbrojtjen e fëmijëve/nxënësve në internet nëpërmjet procesit të rregullt arsimor dhe aktiviteteve jashtëmësimore, duke i përgatitur ata për përdorimin e sigurt të internetit, në përputhje me zhvillimin e tyre fizik, të komunikimit, social, emocional dhe intelektual.
![](https://masht.rks-gov.net/wp-content/uploads/2023/02/329766744-1357377698383754-4860577120148854947-n-1024x683.jpg)
Kjo temë e rëndësishme është pjesë e kurrikulave tona, ku në mënyrë specifike trajtohet tek lënda Teknologji me TIK (në kuadër të fushës kurrikulare Jeta dhe puna) si dhe tek çështjet ndërkurrikulare: Edukimi për medie dhe Globalizimi dhe ndërvarësia.
Tutje, MASHTI ka hartuar edhe pakon e udhëzuesve “Udhëtimi nëpër internet” (dy udhëzuesit për nxënës, një për mësimdhënës dhe një për prindër), me të cilën ofrohen alternativat e përdorimit të internetit në mënyrë të dobishme e të përgjegjshme, duke trajtuar këtë tematikë me çasje ndërkurrikulare, ekstrakurrikulare dhe me mësim zgjedhor.
![](https://masht.rks-gov.net/wp-content/uploads/2023/02/329181686-5455449891221375-1140523734259095123-n-1024x683.jpg)
Last modified: 14 Shkurt, 2023