Kryeministri i Republikës së Kosovës, Albin Kurti bashkë me ministren e Arsimit, Shkencës, Teknologjisë dhe Inovacionit, Arbërie Nagavci dhe ministrin e Administrimit të Pushtetit Lokal, Elbert Krasniqi kanë takuar studentët përfitues të bursave nga komunitetet rom, egjiptian, ashkali, për vitin akademik 2023/24.
Kryeministri Kurti me këtë rast ka thënë se, si Qeveri besojmë se mënyra më e mirë se si një person, një komunitet dhe një shtet mund të përparojë është nëpërmjet arsimit, ndërsa shtoi se gjendet në mesin e studentëve për të ndarë me ata arritjet e tyre si studentë dhe për t’i mbështetur dhe inkurajuar në punën e tyre studimore.
![](https://masht.rks-gov.net/wp-content/uploads/2023/12/od9ALXOw-1024x683.jpeg)
Ministrja e Arsimit, Arbërie Nagavci përgëzoi studentët për përfitimin e bursave, ndërsa i’u uroi suksese në studime dhe në përfitimin e njohurive të cilat do të jenë me interes jo vetëm për ata si studentë, por edhe për familjen dhe shoqërinë.
![](https://masht.rks-gov.net/wp-content/uploads/2023/12/LSsV2S-w-1024x683.jpeg)
Ndër të tjera, ministrja Nagavci tha se po jetësohen zotimet për krijimin e një shoqërie që kujdeset për të gjithë qytetarët, një qeverie që ofron mbështetjen e merituar për secilin dhe një shteti që krijon kushtet që të gjithë të realizojnë potencialin e tyre të plotë.
Ministrja Nagavci po ashtu theksoi se, diversiteti është vlerë e shtuar e shoqërisë sonë multietnike, andaj integrimi i suksesshëm i komuniteteve është më shumë mundësi dhe më shumë progres për shoqërinë tonë. Gjithashtu ministrja Nagavci inkujaroi studentët që të përqëndrohen në arritjen e sukseseve akademike, sepse në këtë mënyrë ata rrisin mundësitë për një punë të mirë, e cila përveç sigurimit të aspektit financiar, do të ndikonte edhe në luftimin e stereotipeve dhe paragjykimeve si dukuri.
Ndryshe, në vitin akademik 2022/2023 MAShTI ka ndarë për herë të parë 26 bursa nga 1000 euro për studentët e vitit të parë universitar nga komunitetet rom, ashkali, egjiptian.
![](https://masht.rks-gov.net/wp-content/uploads/2023/12/aJBiXraR-1024x683.jpeg)
Në vitin akademik 2023/2024 janë përzgjedhur 55 përfitues të bursave nga 1000 euro nga komunitetet rom, ashkali, egjiptian në universitetet publike të Kosovës.
Në vitin 2021/2022 janë ndarë 500 bursa nga 300 euro për nxënës të shkollave të mesme nga komunitetet rom, ashkali, egjiptian. Në vitin 2022/2023 janë ndarë 498 bursa nga 300 euro. Për vitin 2023/2024 janë në proces të shqyrtimit dhe përgatitjes për pagesë 500 bursa nga 300 euro.
![](https://masht.rks-gov.net/wp-content/uploads/2023/12/knXlF-PQ.jpeg)
Last modified: 19 Dhjetor, 2023