Ministri i Arsimit, Shkencës dhe Teknologjisë , Ramë Buja, vizitoi sot Rektoratin e Universitetit të Prishtinës( UP) dhe mori pjesë në ligjëratën e komandantit të KFOR-it, gjeneralmajor Erhard Buhler në Fakultetin e Filologjisë.
Në takimin me rektorin Rugova dhe me bordin udhëheqës të Universitetit të Prishtinës, ministri Buja u informua me punën e Universitetit, sukseset dhe sfidat e së ardhmes . Me këtë rast, ministri i Arsimit, Ramë Buja u shpreh se do të mbështesë këtë institucion , sa herë që do të jetë e nevojshme përfshirë këtu edhe aspekte infrastrukturore, por shtoi se, prioritet i angazhimeve mbetet ngritja e cilësisë në arsim në të gjitha nivelet arsimore në Kosovë.
Nga ana tij, rektori i UP-së, Mujë Rugova veçoi disa mangësi, të cilat vazhdon t’i ketë Universiteti. Ai tha se, Qeveria e Kosovës e ka mbështetë këtë institucion në vazhdimësi dhe pret që edhe sivjet të ndajë buxhet të mjaftueshëm për përmbushjen e nevojave të Universitetit të Prishtinës. Më tej, ai shtoi se, identifikimi i nevojave buxhetore nëpër institucionet e arsimit, duke përfshirë edhe Universitetin e Prishtinës, do të mund të përfshihen në buxhetin e ri, para se ai të shkojë në Kuvend për shqyrtim e miratim.
Ministri i Arsimit, Ramë Buja, po ashtu, ka marrë pjesë edhe në ligjëratën e komandantit të KFOR-it, gjeneralmajor Erhard Buhler me temë “Armata gjermane dhe misioni në Kosovë”, e cila u ndoq me interesim të madh nga shumë të pranishëm në sallën e kuqe të Fakultetit të Filologjisë.
Në fjalën e rastit, ministri Buja i uroi komandantit Buhler sukses në misionin e tij, ndërsa tha se, ndihma e KFOR-it dhe komandantit Buhler për Kosovën ishte shumë e madhe jo vetëm në sfondin ushtarak dhe të sigurisë në vendin tonë, por edhe ne në atë të ndihmesës së popullit dhe grupeve sociale me ndihma të ndryshme materiale.
Last modified: 26 Gusht, 2022
