“Horizon Europe, është programi kryesor i financimit të BE-së për kërkimin dhe inovacionin me një buxhet prej 95.5 miliardë euro. Programi lehtëson bashkëpunimin dhe forcon ndikimin e kërkimit dhe inovacionit në zhvillimin, mbështetjen dhe zbatimin e politikave të BE-së gjatë trajtimit të sfidave globale. Programi po ashtu mbështet krijimin dhe shpërndarjen më të mirë të njohurive dhe teknologjive të shkëlqyera. Ai krijon vende pune, angazhon plotësisht grupin e talenteve të BE-së, nxit rritjen ekonomike, promovon konkurrencën industriale dhe optimizon ndikimin e investimeve në forcimin e Zonës Evropiane të Kërkimit.
Kosova ka marrë pjesë në Programet Kornizë të Kërkimit dhe Inovacionit të BE-së që nga viti 2007, duke filluar me “Programin e shtatë kornizë (FP7)”. Pjesëmarrja e Kosovës si një nga vendet partnere të bashkëpunimit ndërkombëtar (ICPC) rezultoi në 23 aplikime me 3 projekte të fituara, në total 344.135,44 euro. Shkalla e suksesit të Kosovës në FP7 ishte 17,86%. Norma mesatare e suksesit të vendeve të ICPC ishte 22.09 %.
Kosova më pas mori pjesë në programin pasues Horizon 2020, gjithashtu si një vend ICPC, me një nivel të rritur pjesëmarrjeje dhe një numër dukshëm më të madh të projekteve të financuara. Kosova u paraqit me 113 aplikime, me 21 projekte të fituara. Shkalla e suksesit të Kosovës ishte 20.01%, mbi normën mesatare të suksesit të vendeve të ICPC, e cila ishte 18%. Kosova në këtë program ka përfituar me projekte në vlerën prej 2.555.857,00 euro.
Në janar të vitit 2021, Kosova u bë anëtare plotësisht e asociuar në programin Horizon Europe, duke mundësuar që kërkuesit, novatorët dhe entitetet kërkimore të Kosovës të marrin pjesë në të njëjtat kushte si entitetet nga shtetet anëtare të BE-së. Ky është një zhvillim shumë pozitiv që ka mundësuar rritjen e bashkëpunimit midis Kosovës dhe shteteve anëtare të BE-së, si dhe vendeve të tjera pjesëmarrëse në Horizon Europe. Linku i marrëveshjes për statusin e Kosovës si anëtare me të drejta të plota në programin Horizon Europe.
Last modified: 29 Gusht, 2025