27 Shtator 2018
Ministri i Arsimit, Shkencës dhe Teknologjisë, Shyqiri Bytyqi, gjatë vizitës në Shtetet e Bashkuara të Amerikës, është pritur në selinë qendrore të USAID-it në Washington nga Gretchen Birkle, zëvendësndihmës-administratore për Evropë dhe Euro-Azi.
Me këtë rast, ministri Bytyqi u shpreh falënderues për angazhimin e USAID-it në Kosovë në përkrahje të zhvillimit të vendit tonë me projekte, e në veçanti në sektorin e arsimit.
Me ekipin e saj në këtë takim, znj. Gretchen Birkle shprehu interesim për reformat në sistemin arsimor në Kosovë dhe për vështirësitë e këtyre reformave.
Ministri Bytyqi e informoi për masat që janë duke u marrë në nivelin e arsimit parauniversitar dhe atë të lartë.
Gjatë diskutimit për këto reforma, vëmendje e veçantë ju kushtua depolitizimit të sistemit arsimor, ndërsa u bisedua edhe për rolin e sistemit arsimor për luftimin e ekstremizmit të dhunshëm që shpie në terrorizëm. Ndërsa, ministri Bytyqi e informoi znj. Birkle për masat që janë duke u marrë në këtë drejtim.
Në takim u bisedua edhe për projektet që USAID-i ka me MAShT-in dhe institucionet tjera arsimore dhe lidhur me të arriturat e këtyre projekteve.
Në fund të takimit, znj. Birkle shprehu gatishmërinë për të vazhduar dhe zgjeruar bashkëpinimin mes USAID-it dhe MAShT-it.
Last modified: 10 Nëntor, 2022
