Ministrja e Arsimit, Shkencës, Teknologjisë dhe Inovacionit, Arbërie Nagavci, bashkë me Ministren e Punëve të Jashtme dhe Diasporës, Donika Gërvalla dhe rektorin e Universitetit të Prizrenit “Ukshin Hoti”, Mentor Alishani kanë marrë pjesë në ceremoninë e hapjes së Shkollës Verore Ndërkombëtare në Prizren.
Qëllimi i Shkollës Verore Ndërkombëtare në Prizren është të ofrojë një platformë për shkëmbim akademik dhe kulturor ndërmjet studentëve nga vende të ndryshme.
Ministrja Nagavci me këtë rast ka thënë se, ndërkombëtarizimi i arsimit të lartë është një ndër prioritetet e Qeverisë dhe Ministrisë së Arsimit, për të garantuar që studentët të ecin në hap me moshatarët e tyre nga e gjithë bota, teksa shohim pjesëmarrës nga 45 vende të botës dhe nga kontinente të ndryshme.
![](https://masht.rks-gov.net/wp-content/uploads/2024/08/453655691-883951827097518-1614430355424266579-n-1024x683.jpg)
Nagavci theksoi se, Universiteti për herë të parë hapi dyert për qindra studentë e profesorë në vitin 2022, ku kjo shkollë verore nisi rrugëtimin e saj, edicioni i dytë është mbajtur vitin e kaluar dhe ka pasur një efekt të jashtëzakonshëm sidomos në ndërkombëtarizimin e Universitetit të Prizrenit, ndërsa këtë vit është edicion i tretë që do ta vazhdojë më tej traditën e bukur të diversitetit akademik.
Nagavci po ashtu bëri të ditur se, njësitë akademike që janë pjesë e moduleve të kësaj shkolle, vijnë nga fusha tejet të rëndësishme të edukimit dhe tregut të punës, por njëkohësisht ato janë përzgjedhur duke pasur parasysh drejtimet, të cilat u shërbejnë nevojave dhe kërkesave të kohës në të cilën jetojmë.
Ministrja e MPJD-së, Donika Gërvalla, përgëzoi Universitetin e Prizrenit për këtë organizim tradicional të tretin me radhë, i cili mbledhë të rinjë nga vende të ndryshme, duke ju ofruar mundësinë që të njohin më mirë këtë qytet dhe të krijojnë raporte bashkëpunimi mes veti.
![](https://masht.rks-gov.net/wp-content/uploads/2024/08/453177929-883951900430844-2039894872197732371-n-1024x683.jpg)
Rektori Mentor Alishani tha se, pjesëmarrësit e Shkollës Verore do të kenë mundësi që të dëgjojnë ligjerata nga profesorë të kualifikuar në fushat përkatëse nga vende të ndryshme të botës.
Të pranishëm në hapjen e Shkollës Verore ishin rektori i Universitetit të Prishtinës, Qerim Qerimi, kryetarë të komunave, përfaqësues të ambasadave, profesorë dhe studentë të vendeve të ndryshme.
Last modified: 14 Gusht, 2024