Kryeministri i Kosovës Albin Kurti, ministrja e Arsimit, Shkencës, Teknologjisë dhe Inovacionit, Arbërie Nagavci dhe ministri i Administrimit të Pushtetit Lokal, Elbert Krasniqi, kanë takuar sot studentët nga radhët e komuniteteve ashkali, egjiptian dhe rom, të cilët janë përfitues të bursave sipas Marrëveshjes mes dy ministrive.
![](https://masht.rks-gov.net/wp-content/uploads/2023/01/327467407-537129648424486-289909416933718087-n-1024x683.jpg)
Me këtë rast, kryeministri Kurti përmendi faktin se tashmë për të gjithë studentët ofrohet arsimi i lartë pa pagesë, ndërsa theksoi se përmes këtyre bursave në vlerë 1 mijë euro për studentët nga komunitetet, synohet që ata të mos mendojnë për anën financiare, por vetëm për ngritjen e tyre profesionale dhe akademike.
Ministrja Nagavci, ndërkaq, theksoi se Qeveria e Kosovës po punon për krijimin e mundësive të barabarta në arsim, ndërsa theksoi përkushtimin që përmes bursave dhe mekanizmave të tjerë të fuqizohen gjeneratat e reja.
Ministrja Nagavci u uroi suksese në studime me shpresën se këta studentë në vitin e ardhshëm do të përfitojnë bursën elitare. Ajo i porositi studentët e komuniteteve që të shërbejnë si promotorë dhe të nxisin të rinjtë në komunitetin e tyre që të arsimohen.
![](https://masht.rks-gov.net/wp-content/uploads/2023/01/324090532-1693964261000396-5895001976583568545-n-1024x683.jpg)
Last modified: 26 Janar, 2023