Zëvendësministri në detyrë i Arsimit, Shkencës, Teknologjisë dhe Inovacionit, Arsim Ademi, bashkë me këshilltaren, Donika Kastrati pritën sot në takim një delegacion të lartë të OSBE-së, i udhëhequr nga Komisioneri i Lartë për Minoritete Kombëtare, Christophe Kamp, shoqëruar nga këshilltarët, Elia Boggia dhe River Hustad. Të pranishme në takim ishin edhe zëvendësshefja e Misionit të OSBE-së në Kosovë, Cornelia Taylor, drejtoresha e Departamentit për të Drejtat e Njeriut , Kavya Rajan, si dhe zyrtarja për çështje politike, Drita Gjeli.
Në këtë takim, fokus kryesor ishte adresimi i çështjeve të arsimit, gjuhës dhe të drejtave të komuniteteve në sistemin arsimor.
Zëvendësministri, Arsim Ademi falënderoi delegacionin për vizitën dhe shprehu gatishmërinë e Ministrisë së Arsimit për bashkëpunim të ngushtë në fusha që kanë rëndësi të veçantë për përfshirjen e komuniteteve dhe fuqizimin e tyre përmes arsimit dhe edukimit.
Zv/ministri Ademi prezantoi politikat e MAShTI për sigurimin e qasjes së barabartë dhe gjithëpërfshirëse në arsim, e cila garantohet përmes zbatimit të Ligjit për Arsimin në Komuna dhe zbatimit të Strategjisë së Arsimit 2022–2026, e cila parasheh masa për sigurimin e qasjes së barabartë në materiale mësimore për të gjitha komunitetet.
Komisioneri i Lartë për Minoritete Kombëtare, Christophe Kamp foli për mandatin e tij i cili fokusohet në marrëdhëniet ndëretnike dhe promovim të bashkëjetesës në shoqëri, përmes sigurimit të qasjes së barabartë në sistemin arsimor.
Last modified: 29 Gusht, 2025
