Zëvendësministri i Arsimit, z. Nehat Mustafa së bashku me zëvendëskryeministrin e Turqisë, z. Emrullah Ishler, kanë marrë pjesë sot në ceremoninë e përurimit të aneksit të shkollës së mesme të ulët “Meto Bajraktari”, në fshatin Reçan të Prizrenit, në të cilën vijojnë mësimin nxënësit e komunitetit boshnjak.
Ndërkaq, gjatë ditës, z. Mustafa dhe z. Ishler kanë përuruar edhe amfiteatrin dhe hapësirën për administratë të Universitetit “Ukshin Hoti” në Prizren.
Me këtë rast, zv/ministri Mustafa ka falënderuar Qeverinë e Turqisë për mbështetjen e vazhdueshme që po i jep proceseve zhvillimore në Kosovë, sidomos në fushën e arsimit.
Zv/ministri Mustafa theksoi se Kosova dhe Turqia po e thellojnë gjithnjë e më shumë bashkëpunimin në fushën e arsimit, ndërsa përmendi faktin se edhe Universiteti i Prizrenit ka bërë hapa konkret duke e shtrirë këtë bashkëpunim me shumë universitete të Turqisë.
Ndërkaq, zv/ministri Mustafa kërkoi nga delegacioni turk që të inkurajojnë edhe më shumë universitetet turke të vazhdojnë bashkëpunimin me universitetet e Kosovës sidomos në fushën e hulumtimeve shkencore përmes projekteve të ndryshme.
Zv/kryeministri i Turqisë tha se vendi i tij po e ndihmon arsimimin e të rinjëve në Kosovë në forma të ndryshme duke dhënë kontribut edhe në krijimin e kushteve më të mira për shkollim. Ai tha se shteti i tij do të vazhdojë ta ndihmojë arsimin në Kosovë në të gjitha nivelet.
Zv/kryeministri i Turqisë, z. Emrullah Ishler, po ashtu ka uruar komunitetin turk për “Ditën e turqve të Kosovës”.
Ndërtimi i këtyre hapësirave shkollore (7 dhoma mësimi ) në Reçan dhe amfiteatri në UPZ , është investim i përbashkët i organizatës qeveritare TIKA – Turqi dhe MAShT -i.
Last modified: 1 Shtator, 2022
