Nxënësit e shkollës “Tre dëshmorët e shkollës shqipe” në fshatin Uçë të Istogut do të mësojnë në objektin e ri, i cili u përurua sot dhe është investim i Ministrisë së Arsimit, Shkencës, Teknologjisë dhe Inovacionit.
Në ceremoninë e përurimit, në emër të ministres Arbërie Nagavci, shefja e Kabinetit Bora Shpuza, uroi nxënënsit, mësimdhënësit, prindërit dhe gjithë komunitetin për objektin e ri të shkollës, e cila sot shënonte edhe ditën e shkollës, që është data e rënies së dëshmorëve Muharrem Hysenaj, Hasan Hysenaj dhe Bajram Hoxhaj, vepra e të cilëve është jetësuar në emrin e shkollës.
Duke folur për veprën e këtyre dëshmorëve që dhanë jetën për të drejtën e fëmijëve në shkollim dhe arsim, Shpuza tha se emri i shkollës është nderi më i madh që i bëhet kujtimit të tyre dhe kjo shkollë e re për fëmijet e Uçës është institucion i merituar në këtë vend që i dha kaq shumë lirisë.
Ndërsa, sa i përket kontributit në arsimimin e shumë gjeneratave, ajo theksoi faktin se kjo shkollë, sot ka shënuar 81 vjetorin e themelimit, pra është një prej shkollave të para shqipe në Kosovë, e ngritur që nga viti 1942.
Për ndërtimin e objektit të ri të shkollës “Tre dëshmorët e shkollës shqipe”, MAShTI ka investuar rreth 712 mijë euro.
Last modified: 31 Janar, 2023
