MASHT

Përmbyllet me sukses projekti ALLED 2

2 Prill, 2025

Ministrja e Arsimit, Shkencës, Teknologjisë dhe Inovacionit, Arbërie Nagavci ka marrë pjesë në ceremoninë përmbyllëse të projektit ALLED 2, projekt i cili ka kontribuar në zbatimin e Planit Strategjik të Arsimit 2017-2021 dhe në hartimin e Strategjisë së Arsimit 2022-2026. Në ceremoni morën pjesë edhe Ambasadori i Bashkimit Evropian në Kosovë, Aivo Orav, Ambasadori i Austrisë, Georg Schnetzer, Udhëheqësja e Zyrës Koordinuese të ADA-s, Rita Glavitza, si dhe bashkëpunëtorë të arsimit dhe përfaqësues të bizneseve.

Ministrja Nagavci tha se ky projekt ka sjellë një sërë përmirësimesh në sistemin e arsimit profesional në Kosovë, duke u fokusuar në modernizimin e institucioneve arsimore, përmirësimin e qeverisjes së bazuar në të dhëna, bashkëpunimin e strukturuar me bizneset, zhvillimin e Akreditimit, etj. Ajo bëri të ditur se brenda mandatit, janë realizuar 25 shkolla profesionale në komuna të ndryshme të Kosovës, ku po zhvillohet arsimi dual, dhe tashmë janë 12 profile të ndryshme, prej të cilave, mbi 1600 nxënës janë përfitues të këtij procesi deri tani. Në fjalën e saj, Ministrja Nagavci theksoi rëndësinë e vazhdimit të reformave në arsimin profesional dhe rolin kyç që projektet si ALLED 2 kanë në përmirësimin e tij.

Ajo shprehu mirënjohje për Bashkimin Evropian, Agjencinë Austriake për Zhvillim (ADA) dhe të gjithë partnerët e përfshirë në këtë projekt. Ndër të tjera Ministrja shtoi se arritjet e projektit ALLED 2 dëshmojnë se bashkëpunimi me institucionet evropiane sjell transformime të qëndrueshme në sistemin arsimor. Ambasadori i Bashkimit Evropian në Kosovë, Aivo Orav, përmendi se ALLED 2 ka kontribuar në realizimin e më shumë trajnimeve profesionale të cilat lidhen me nevojat e tregut të punës.

Ambasadori Orav falënderoi MAShTI-n dhe ADA-n për mbështetjen dhe përkushtimin e tyre për realizimin e projektit ALLED 2. Ndërsa Ambasadori i Austrisë, Georg Schnetzer, falënderoi Ministrinë e Arsimit, Shkencës, Teknologjisë dhe Inovacionit, si partnerë kyq në implementimin e ALLED 2, dhe në veçanti falënderoi Ministren Nagavci për udhëheqjen e suksesshme të këtij projekti i cili tashmë ka arritur objektivat dhe ka lënë rezultate të prekshme.

Last modified: 2 Prill, 2025