Ministrja e Arsimit, Shkencës, Teknologjisë dhe Inovacionit, Arbërie Nagavci ka pritur në takim presidenten e Këshillave Amerikane për Edukimin Ndërkombëtar, Lisa Choate, drejtorin e zyrës së Këshillave Amerikane në Kosovë, Gjeni Shporta dhe drejtoreshën rajonale të Këshillave Amerikane, Elvira Dana, me të cilët ka biseduar për shqyrtimin e mundësive të reja për të kontribuar në zhvillimin arsimor në Kosovë përmes programeve për Bordin e Shkëmbimit Arsimor SHBA-Kosovë (USKEB) dhe Programin e Shkëmbimit të të Rinjëve Kennedy-Lugar (YES).
Gjatë takimit ministrja Nagavci u shpreh e lumtur për bashkëpunimin me Fondin Kosovaro-Amerikan për Arsim (KAEF), ku falënderoi Këshillat Amerikane për angazhimin dhe shkëmbimin e të rinjëve dhe stafit arsimor, mes Kosovës dhe Shteteve të Bashkuara të Amerikës.
Nagavci tutje tha se, jemi të lumtur për bashkëpunimin dhe të gjitha storiet e suksesit që kemi deri tani me Fondin Kosovaro-Amerikan për Arsim (KAEF) dhe për këtë vitin e kaluar janë ndarë më shumë se 100,000 euro për Programin e Shkëmbimit të të Rinjëve Kennedy-Lugar (YES), duke qenë se është e rëndësishme për ne, që studentët të përfitojnë sa më shumë.
Në takim, po ashtu u diskutua edhe për Edukimin Medial dhe integrimin e tij në kurrikulat shkollore, për çka ministrja Nagavci theksoi rëndësinë e përfshirjes si lëndë në shkollat fillore dhe të mesme, në mënyrë që të evitohet dezinformimi dhe edukimi mbi marrjen e informatave.
Ndërsa, presidentja e Këshillave Amerikane, Lisa Choate tregoi se, studentët e shkëmbyer përmes programit YES, e kuptojnë se kanë pasur një mundësi të veçantë për shkëmbimin e përvojave të tyre, për të cilët Choate tha se, zakonisht vazhdojnë me studime dhe kthehen prapë në Kosovë për të kontribuar për vendin e tyre.
Last modified: 15 Nëntor, 2024
