Ministri i Arsimit, Shkencës dhe Teknologjisë, z. Arsim Bajrami ka pritur në takim konsultativ rektorët e Universiteteve Publike të Kosovës, me të cilët ka biseduar për mundësitë dhe modulet e konstituimit të Konferencës së Rektorëve të Universiteteve të Kosovës.
Konferenca e Rektorëve e përbërë kryesisht nga rektorët e universiteteve, do të shqyrtoj çështje të ndryshme që kanë të bëjnë me harmonizimin e pikëpamjeve rreth kaheve të zhvillimit të politikave të Arsimit të Lartë.
Ky organ konsultativ i rektorëve , përveç tjerash do të merret edhe me koordinimin dhe harmonizimin e politikave të arsimit të lartë edhe në nivel kombëtarë, si dhe format e bashkëpunimit të ndërsjellë .
Ministri Bajrami e vuri në theks rëndësinë e organizmit të një organi të nivelit të lartë konsultativ i cili do të adresoi një sërë çështjesh me interes dhe ku rektorët do të paraqisnin sfidat dhe të arriturat, njëkohësisht do të shtronin nevojën për ndryshime eventuale në funksion të përmirësimit të cilësisë dhe imazhit të Arsimit të Lartë në Kosovë.
Ministri Bajrami poashtu tha se, është e nevojshme që universitetet të fokusohen në reduktimin e profileve të ndryshme studimore dhe të ofrojnë programe të cilat ndërlidhen me nevojat e tregut të punës.
Në këtë takim u fol edhe për procesin e akreditimit të programeve të reja, si dhe për përgatitjen e konkurseve për pranimin e studentëve për vitin e ri akademik.
Ministri Bajrami, me këtë rast ka insistuar që rektorët të jenë të përpiktë në këtë proces, ku edhe do të përcaktohen kuotat e pranimit të studentëve nga viset tjera shqiptare.
Iniciativa e ministrit Bajrami për konstituimin Konferencës së Rektorëve, u përkrah nga rektorët e pranishëm, të cilët e vlerësuan pozitivisht , njëherësh u zotuan se do të jenë bashkëpunues dhe konstruktiv , me qëllim të arritjes së objektivave të përbashkëta .
Last modified: 30 Gusht, 2022
