Ministri i Arsimit, Shkencës dhe Teknologjisë, z. Arsim Bajrami, priti një delgacion të Komisonit Evropian, të kryesuar nga znj. Helene Skikos, zyrtare e lartë dhe kordinatore për edukim dhe kulturë e Komisonit Evropian për Ballkanin Perëndimor, ku u diskutuan zhvillimet në fushën e arsimit, me theks të veçantë gjendjen në arsimin e lartë dhe përkushtimin e Ministrisë së Arsimit për sigurimin e cilësisë.
Ministri Bajrami e informoi znj. Skikos lidhur me hapat që janë duke u ndërmarrë në zhvillimin e arsimit të lartë, reformën në legjislacion, autonominë dhe llogaridhënien e universiteteve, financimin e universiteteve në bazë të performancës dhe orientimin e programeve studimore me tregun e punës.
Gjithashtu, ministri Bajrami theksoi gatishmërinë dhe vullnetin e Qeverisë së Kosovës për të mbështetur programin Erasmus +, si përpjekje e përbashkët për arritjen e standardeve të cilësisë në arsimin e lartë.
Ndërsa, znj. Skikos e ka vlerësuar përkushtimin e ministrit Bajrami për ngritjen e cilësisë në arsim, duke thënë se këto përpjekje janë duke u marrë me prioritet edhe nga ana e Komisonit Evropan, i cili është edhe donator i rëndësishëm i zhvillimit të arsimit në Kosovë.
Ministri Bajrami dhe znj. Skikos kanë folur edhe për takimin e radhës të ministrave të vendeve të Ballkanit Perëndimor, i cili do të mbahet në Bonjë dhe Hercegovinë,
në kuadër të Platformës për Arsim dhe Trajnim për Ballkanin Perëndimor.
Last modified: 30 Gusht, 2022
