Ministri i Arsimit, Shkencës dhe Teknologjisë, z. Arsim Bajrami priti një grup ekspertësh të arsimit profesional të kantonit të Cyrihut të Zvicrës , me të cilët bisedoi për mundësitë e bashkëpunimit ndërmjet dy vendeve,mundësitë e trajnimit të mësimdhënësve dhe drejtorëve të shkollave profesionale , njëherësh u prezantua një program dokumentar të punës praktike të nxënësve në ndërmarrje dhe institucione të Zvicrës.

Ministri Bajrami, njoftoi mysafirët për ecuritë në arsimin e Kosovës, me fokus arsimin profesional, me ç`rast tha se mësimi dual, ndërlidhja e shkollës me ekonominë është synim yni i së ardhmes, ndërsa shtoi se jemi shumë të angazhuar  që të krijojmë partneritete shkollë ndërmarrje  dhe krahas kësaj rritjen e cilësisë në arsim.

Ministri Bajrami theksoi nevojën e bashkëpunimit ndërmjet dy vendeve, që Kosova , të përfitojë nga përvoja dhe modelet zvicerane të organizimit të arsimit profesional, si një ndër sistemet më të avancuara të arsimit në botë , njëherësh tha se aftësimi i të rinjve për tregun  e punës  në rini të hershme është me rëndësi jetike për të ardhmen e vendit.  

Ministri Bajrami gjithashtu tha se, është  me rëndësi të veçantë orientimi në karrierë, punësimi i të rinjve në rini të hershme  ku ata do të pavarësohen, të bëhen të zotë në profesionin e tyre, të krijojnë  të ardhura dhe një ditë  mbase të vazhdojnë edhe me shkollimin e lartë, ndërsa modelet zvicerane të arsimit profesional janë shembull i mirë që duhet të ndjekim edhe ne  tha ministri Bajrami.

Ministri Bajrami  ka falënderuar vendet e Bashkimit Evropian, me ndihmën e të cilave tashmë janë ndërtuar disa Qendra të Kompetencës, ku zhvillohet mësimi teorik dhe praktik ,  ku  nxënësit, përkatësisht shkolla krijojnë produkte për treg , por theksoi nevojën e hartimit të kurrikulës dhe teksteve shkollore adekuate për  arsimin profesional, si dhe trajnimin e vazhdueshëm të mësimdhënësve.

Ndërsa, z Giorgio Ciroli , ekspert i arsimit profesional dhe menaxhimit publik  tha se  është shumë i impresionuar me të arriturat e Kosovës për një periudhë të shkurtër  dhe shprehu gatishmërinë për bashkëpunim dhe mbështetje  në zhvillimin e  arsimit profesional, në Kosovë për faktin se  kjo shton gjasat për punësim të të rinjve dhe zhvillimin ekonomik të vendit.

Në fund u prezantua një  material dokumentar, i gjiruar në ambiente të ndryshe  në kohën kur nxënësit zviceran bëjnë punën praktike, duke ofruar kështu një model të mirë të organizimit të mësimit, ndërlidhjes se teorisë me praktikën.